| dionisiy1500 | Дата: Пятница, 09.02.2018, 16:52 | Сообщение # 1 |
 Генералиссимус
Группа: Администраторы
Сообщений: 2320
Статус: Offline
| У некоторых подвижников бывает проблема недостатка "духовной силы" Подумал, что в этом случае хорошо утвердиться в силе Церкви через чтение Помянника.
Предлагаю, как мне кажется, подходящий текст.
Помянник
Помяни, Господи Иисусе Христе Боже наш, милости и щедроты твоя от века сущыя, ихже ради и вочеловечился еси, и распятие и смерть спасения ради право в Тя верующих претерпети изволил еси: и воскрес из мертвых, вознеслся еси на небеса, и седиши одесную Бога Отца, и призираеши на смиренные мольбы, всем сердцем призывающим Тя, приклони ухо Твое, и услыши смиренное моление мене непотребного раба Твоего, в воню благоухания духовного Тебе за вся люди Твоя приносящего.
*
И в первых помяни Церковь Твою святую, соборную и апостольскую, юже снабдел еси честною своею кровию, и утверди, укрепи, и разшири, умножи, умири, и непреобориму адовы враты во веки сохрани: раздирания церквей утиши, шатания языческая угаси, и ересей востания скоро разори и искорени, и в ничтоже силою Святаго Твоего Духа обрати.
*
Спаси Господи, и помилуй святейшие патриархи православныя, великого господина и отца нашего ..., святейшего патриарха московского и всея Руси, и Господина нашего высокопреосвященнейшего …, митрополита Ярославского и Ростовского и святые обители сея священноархимандрита, иереи же и диаконы, и весь причет церковный, яже поставил еси пасти словесное Твое стадо: и молитвами их помилуй, и спаси мя грешнаго.
*
Спаси, Господи, и помилуй богохранимую страну нашу и православные люди ея, во отечестве и в рассеянии сущыя, страну сию и власти ея, огради миром их и глаголи мирная и благая в сердцах их о Церкви Твоей святей и о всех людех Твоих: да и мы в тишине их тихое и безмолвное житие поживем во правоверии, и во всяком благочестии и чистоте.
*
Спаси, Господи, и помилуй отца нашего игумена ... со всею братиею, и молитвами их и мене окаянного помилуй.
*
Спаси, Господи, и помилуй отца моего духовного ..., и святыми его молитвами, прости моя согрешения.
*
Спаси, Господи, и помилуй вся служащыя в трудех, во святей обители сей братию нашу: рукодельныя же и мирския работники, и земледельцы монастыря сего, и вся христианы.
*
Спаси, Господи, и помилуй родители моя, ..., и братию, и сестры, и сродники моя по плоти, и вся ближния рода моего, и други, и даруй им мирная Твоя и премирная благая.
*
Спаси, Господи, и помилуй во святогорских монастырях, и в российских, и во иных местех живущыя и пребывающыя отцы и братию нашу, и сестры, и молитвами их помилуй и мене грешнаго.
*
Спаси, Господи, и помилуй по множеству щедрот Твоих вся священноиноки, иноки же и инокини, и вся в девстве же и благоговении и постничестве живущыя в монастырех, в пустынях, в пещерах, горах, столпех, затворех, разселинах каменных, островех же морских, и на всяком месте владычества Твоего праверно живущыя, и благочестно служащыя Ти, и молящыяся Тебе: облегчи им тяготу, и утеши их скорбь, и к подвигу от Тебе силу и крепость им подаждь, и молитвами их даруй ми оставление грехов.
*
Спаси, Господи, и помилуй старцы и юныя, нищыя и сироты, и вдовицы, и сущыя в болезни и в печалех, бедах же и скорбех, обстояниих и пленениих, темницах же и заточениих: изряднее же в гонениих Тебе ради, и веры православныя, от язык безбожных, от отступник, и от еретиков, сущыя рабы Твоя: и помяни я, посети, и укрепи, утеши, и вскоре силою Твоею ослабу, свободу и избаву им подаждь.
*
Спаси, Господи, и помилуй благотворящыя нам, милующыя и питающыя нас, давшыя нам милостыню, и заповедавшыя нам недостойным молитися о них, и упокоевающыя нас: и сотвори милость Твою с ними, даруя им вся, яже ко спасению прошения, и вечных благ восприятие.
*
Спаси, Господи, и помилуй посланныя в службу, путешествующыя отцы и братию нашу, и сестры, и вся православныя христианы.
*
Спаси, Господи, и помилуй, ихже аз безумием моим соблазних, и от пути спасительнаго отвратих, к делом злым и неподобным приведох: божественным Твоим промыслом, к пути спасения паки возврати.
*
Спаси, Господи, и помилуй ненавидящыя и обидящыя мя, и творящыя ми пакости, и не остави их погибнути мене ради грешнаго.
*
Отступившыя от православныя веры, и погибельными ересьми ослепленныя, светом Твоего познания просвети, и святей Твоей апостольстей соборней Церкви причти.
*
Богохульную власть вскоре испровержи, и правоверным подаждь: правоверие же утверди, и воздвигни рог христианский, и низпосли на нас милости Твоя богатыя.
*
Помяни, Господи, от жития сего отшедшыя правоверныя цари и царицы, благоверныя князи и княгини, святейшыя патриархи, преосвященныя митрополиты, архиепископы и епископы православныя, во иерейском же и в притче церковном, и иноческом чине Тебе послужившыя, и блаженныя ктиторы святыя обители сея, и в вечных Твоих селениих со святыми упокой.
*
Помяни, Господи, души усопших рабов Твоих, родителей моих, ..., и всех сродников по плоти: и прости их вся согрешения вольная и невольная, даруя им царствие и причастие вечных Твоих благих, и Твоея безконечныя и блаженныя жизни наслаждение.
*
Помяни, Господи, и вся в надежди воскресения и жизни вечныя, усопшыя отцы и братию нашу и сестры, и зде лежащыя и повсюду православныя христианы, и со святыми Твоими, идеже присещает свет лица Твоего, всели, и нас помилуй, яко благ и человеколюбец, аминь.
*
Подаждь, Господи, оставление грехов всем, прежде отшедшим в вере и надежди воскресения, отцем, братиям и сестрам нашым, и сотвори им вечную память.
**
Богу нашему слава. Аминь.
|
| |
| |
