dionisiy1500 | Дата: Четверг, 06.05.2021, 18:48 | Сообщение # 1 |
Генералиссимус
Группа: Администраторы
Сообщений: 2203
Статус: Offline
| мф13:1 В день же той изшед Иисус из дому, седяше при мори. мф13:2 И собрашася к нему народи мнози, якоже ему в корабль влезти и сести: и весь народ на брезе стояше. мф13:3 И глагола им притчами много, глаголя: се, изыде сеяй, да сеет: мф13:4 и сеющу ему, ова падоша при пути, и приидоша птицы и позобаша я: мф13:5 другая же падоша на каменных, идеже не имеяху земли многи, и абие прозябоша, зане не имеяху глубины земли: мф13:6 солнцу же возсиявшу присвянуша, и зане не имеяху корения, изсхоша: мф13:7 другая же падоша в тернии, и взыде терние и подави их: мф13:8 другая же падоша на земли добрей и даяху плод, ово убо сто, ово же шестьдесят, ово же тридесять: мф13:9 имеяй ушы слышати да слышит. * мф13:10 И приступивше ученицы (его) рекоша ему: почто притчами глаголеши им? мф13:11 Он же отвещав рече им: яко вам дано есть разумети тайны Царствия небеснаго, онем же не дано есть: мф13:12 иже бо имать, дастся ему и преизбудет (ему): а иже не имать, и еже имать, возмется от него: мф13:13 сего ради в притчах глаголю им, яко видяще не видят, и слышаще не слышат, ни разумеют: мф13:14 и сбывается в них пророчество исаиино, глаголющее: слухом услышите, и не имате разумети: и зряще узрите, и не имате видети: мф13:15 отолсте бо сердце людий сих, и ушима тяжко слышаша, и очи свои смежиша, да не когда узрят очима, и ушима услышат, и сердцем уразумеют, и обратятся, и изцелю их. мф13:16 Ваша же блаженна очеса, яко видят, и уши ваши, яко слышат: мф13:17 аминь бо глаголю вам, яко мнози пророцы и праведницы вожделеша видети, яже видите, и не видеша, и слышати, яже слышите, и не слышаша. * мф13:18 Вы же услышите притчу сеющаго: мф13:19 всякому слышащему слово Царствия и не разумевающу, приходит лукавый и восхищает всеянное в сердцы его: сие есть, еже при пути сеянное. мф13:20 А на камени сеянное, сие есть слышай слово и абие с радостию приемлет е: мф13:21 не имать же корене в себе, но привременен есть: бывши же печали или гонению словесе ради, абие соблажняется. мф13:22 А сеянное в тернии, се есть слышай слово, и печаль века сего и лесть богатства подавляет слово, и без плода бывает. мф13:23 А сеянное на добрей земли, се есть слышай слово и разумевая: иже убо плод приносит и творит ово сто, ово же шестьдесят, ово тридесять. **
Богу нашему слава. Аминь.
|
|
| |